Maubisse oan sira iha Irlanda no Inglaterra kontribui osan hodi hari cruz no altar iha semiterio jeral maubisse ne’ebe oras ne dadaun besi komesa feruzen no at ona tamba ho durasaun tempo nebe naruk tebes.
Tamba ne Chefe Suku Maubisse Villa ho joven balu ho inisiativa hodi hafoun hikas fali kreuz refere no sei hari mos meza altar iha rate boot Maubisse no orsamentu nebe sosa material hodi hari cruz no altar iha rate boot Maubisse ne’e kontribui mai husi Maubisse Oan sira iha Inglaterra no Irlanda.
Ba jornalista Radio Komunidade Maubisse, 17/10/2020, Xefe Suku Maubisse Villa Wilson Nivio Mendonca hateten katak fundus nebe apoiu hodi halao konstrusaun ba kruz no meza altar iha semiterio Maubisse Vila hetan apoiu husi Komunidade Maubisse oan nebe servisu iha Irlandia no Inglatera.
Alende ne’e sefe suku ne saliena liu tan katak koperasaun entre komunidade Maubisse oan sira lao diak tebes iha parte fiziku nian nune hodi apoiu ba konstrusaun hari kruz iha Semiterio Maubisse Villa, enkuantu nia parte mos haktuir liu tan katak antes ne’e halao planu ba konstrusaun dahuluk kruz no meza refere hetan ona autorizasaun no apoiu moral husi Amu Paroco Maubisse.
Nune’e mos Costantinu Fernandes hanesan jerasaun foun ida nia parte senti kontenti ho apoia ne’ebe apoiu husi komunidade maubisse rasik nebe servisu hela iha Irlandia no Inglaterra hodi hari Cruz iha Semiterio Maubisse Villa, tamba ne’e apoiu ne’ebe apoiu husi Maubisse oan nebe servisu iha Irlandia no Inglatera mai Maubisse laos ba pessoal maibe ba komunidade em jeral iha Postu Maubisse.
Entertantu Costantino nia parte agradese ba maluk nebe mak apoiu ona fundus hodi halo konstrusaun ba kruz no meza altar refere, tamba ne’e nia husu atu apoiu ida ne’e la bele para iha ne’e deit, maibe nafatin kontinua apoiu hodi halao mos aktividade sira seluk ne’ebe ba sidadaun hotu iha postu Administrativo de Maubisse.
Xefe Suku Maubisse Villa ne’e akresenta liu tan katak ho apoiu ne’ebe iha hodi halao kostrusaun no meza altar iha semiterio maubisse villa ida ne laos ba pesoal maibe ida ne’e ba ema hotu, tamba ne’e presiza hotu hotu nia kolaborasaun, koperasaun, no tau hanoin hamutuk hodi halao servisu. Konstrusaun ba cruz ho meza altar iha semiteriu maubisse villa apoiu husi komunidade maubisse oan nebe servisu iha irlanda no inglatera ho montante hamutuk dolar rihun ida atus ualu nen nulu resin ida sentavus sia nulu.
Jornalista Juliana Maria Ferrao
Editor Racom Maubisse Mauloko
