Fundasaun MAHARU ho Plan Internasional Oferese Meja no Kadeira ba Eskola Paralelu Dorabi Edi Maubisse.

0
648 views

Fundasaun Maharu Hamutuk ho Plan Internasional Oferese Meja no Kadeira ba Estudante Eskola Paralelu Dorabi Edi Maubisse.

Kuarta feira loron 28 fulan Jullu ne’e fundasaun Maharu ne’ebe hetan Apoiu Fundus husi Plan Internasional Oferese Kadeira Sanolu Rsin Rua (12), Inklui Meja Sanolu Rsin Rua (12) ba Estudante Eskola Paralelu Edi Dorabi, Suku Edi Postu Administrativo Maubisse Municipio Ainaro.

Iha Eskola Paralelu Dorabi, Programa Manager Fundasaun Maharu Bernardino  Martins Dias ba Jornalista Radio Komunidade Maubisse Mau-Loko hateten, Apoiu ida ne’e halao tamba hetan Apoiu fundus husi Plan Internasional Liu husi fundasaun Maharu. Tamba tuir realidade Estudante sira iha Eskola ne’e laiha kadeira no meja hodi fasilita Prosesu Apredisazen ho diak. Maske iha ona kadeira maibe la sufusiente, no estudante sira iha eskola Paralelu ne’e utilija fali kadeira nakfilak ba meja hodi hakerek.

“Tamba hare ba ita nia oan sira liu-liu iha Eskola Paralelu Dorabi nian tamba iha prosesu tomak ne’ebe durante ne’e ita hetan katak ita nia oan sira ne’e tu’ur iha rai no laiha kadeira ho meja. Entaun ho intensaun ida ne’e maka ita husi Fundasaun Maharu ne’ebe apoiu orsamentu husi Plan Internasional ita apoiu meja 12 no kadeira 12 atu bele fo’o ba ita nia oan sira atu nu’une’e ita nia oan sira bele aprende ho diak. Tamba durante ne’e ita nia oan sira iha kadeira ne’ebe ki’ikoan entaun sira uja kadeira ne’e ba hakerek fali no sira tu’ur deit iha rai hodi hakerek. Tenik Benardino Martins Dias Progrm Manager Fundasaun Maharu 28/07/2021.

Program Manager Fundasaun Maharu ne’e, kuntinua hatutan maske mobiliariu hanesan kadeira ho meja ne’ebe maka oferese la sufiseinte ba Estudante hamutuk Nen Nolu (60) iha Eskola Paralelu ne’e, maibe sei buka mesus nafatin atu bele kompleta iha tempu tuir mai.

Iha fatin hanesan mo’os Program Manager Alterasaun Mudansa Klimatika no Redusaun Risku Dezastre husi Plan Internasiona Timor Leste Pedruco Capelao hateten, ida ne’e atu kompelta ba esforsu Governo nian maske ki’ik maibe  ida ne’e maka kontribuisaun husi Plan Internasional nian, liu husi fasilidades ba estudante sira hodi garante prosesu aprendisazen ho diak iha Eskola.

“Hare ba ita nia kondisaun Eskola ne’ebe maka la dun diak no ladun fo’o espasu ne’ebe maka siguru ba ita nia alunus sira entaun Plan ho Maharu liu husi Finanseiru ne’ebe hetan   husi  Sida/Swedia nian atu komplementa ba iha esforsu Governu  ne’ebe maka iha  maske uitoan Ki’ik maibe ita bele kontribui ba ita nia Nasaun ita nia Municipio, pelumenus estudante sir abele asesu ba fasilidades  minimu ne’e  bele uja ba prosesu aprendisazen nu’une’e bele garante kualidade iha futuru.” Haktenik Pedruco Capelao Program Manager ba Alterasaun Mudansa Klimatika no Redusaun Risku Dezastre husi Plan Internasional 28/07/2021.

Hafoin interga Vasilidades kadeira no meja hirak ne’e ba Estudante sira ne’e iha Eskola Paralalu Dorabi Suku Edi Postu Administrativo Maubisse. Koordenador Eskola EBF Lobubu  Mateus da Silava ba Jornalista Radio Komunidade Maubisse Mau-Loko hateten, nia parte agradese ba Plan Internasional ho nia parseiru Fundasaun Maharu ba Apoiu hirak ne’ebe maka oferese ona ba Estudante sira iha iha Eskola Paralelu ne’e.

“Ajudus ne’ebe ofrese husi Fundasaun Maharu no Plan ne’ebe maka ajuda ami nia eskola ne’e bele fasilita ami nia ensinu aprendisazen iha ami nia Eskola. Liu-liu ba ami nia Eskola hanesan Paralelu Filial husi Lobibu, iha biban ida ne’e mo’s ami hato ami nia agradesementu ba Plan no Maharu ne’ebe ho laran luak tebes ajuda ami nia Eskola ida ne’e liu-liu ba meja no kadeira.” Hateten Koordenador Eskola EBF Lobibu Suku Edi Maubisse 28/07/201.

Alende ida ne’e mo’os apoiu fasilidades husi Plan Internasional ho Fundasaun Mahatu ba Eskola ne’e kompostu husi mesa 12 no kadeira 12, ho total Estudantes iha eskola ne’e hamutuk Nen Nolu (60) fahe bas ala rua.

Entertanto Apoiu ida ne’e halao  tamba Plan Internasional hetan Apoiu Fundus husi Governo Swedia no Implementa husi Fundasaun Maharu.

Jornalista         Natalino Mendonça

Editor              Moises da Silva Magno

0 0 votes
Article Rating
Subscribe
Notify of
guest
0 Comments
Inline Feedbacks
View all comments